مستجدات

مسطرة تقديم شكاية شيك بدون رصيد


■اشنو الاجراءات القانونية اللي خاصني ندير ادا رجع ليا الشيك بدون رصيد:


1- خاص البنكة تعطيك شهادة كتشرح فيها الاسباب أو السبب (اللي كيكون فالغالب هو عدم التوفر على الرصيد)


2- يتسحسن أنك تواصل مع صاحب الشيك و تعاود ليه شنو وقع معاك...

حيت فبعض الحالات كيكون غير خطأ أو سهو ...

بحيت ان داك الشخص مكيكونش ضابط حسابو مزيان و مكيعرفش ان واحد الشيك لفلاني غادي يطيح ليه فالتاريخ لفلاني...

ديما سبق أخي الكريم،أختى الكريمة  حسن النية...


3- يلا السيد اللي عطاك الشيك مبغاش يتعامل معاك...

كتمشي دير شكاية عند وكيل الملك..

شكاية اللي المضمون ديالها جنحة اصدار شيك بدون رصيد...

الشكاية كتدفعها مع الاصل ديال الشيك...

يستحسن ان هاد الشكاية تدار عن طريق محامي..

لضمان احترام الشروط و القواعد..


4- وكيل الملك كيصيفط الشكاية للشرطة القضائية..

اللي كتصيفط استيدعاء للطرف الاخر (يقدرو يعيطو ليه فالتليفون أو يصيفطو ليه استدعاء).


5- يلا المشتكى به استاجب للاستيدعاء..

فكيتم الاستماع اليه فمحضر رسمي،و كيتقدم لوكيل الملك اللي بدورو كيسولو واش قادر يخلص الشيك...

يلا السيد خلص اللي عليه فكيتم الافراج ديالو.


6- يلا الشيك متخلصش...

فيمكن لوكيل الملك (في حالة توفر ضمانات باش المشتكى به يخلص اللي عليه) يعطي مهلة ديال 24 ساعة في اطار الحراسة النظرية..

أما في حالة عدم توفر القدرة على الاداء..

فيتم ايداعه السجن في اطار الاعتقال الاحتياطي ومن بعد كيدوز للمسطرة.


7- يلا المشتكى به ممشاش عند البوليس..

فهاذ الحالة وكيل الملك كيصدر مذكرة بحث وكيتم الاعتقال ديال المعني بالامر فينما كان.


●اللي خاص الواحد يعرف،انه وخا الشيك تخلص...

فيتم متابعة المشتكى به في حالة صراح..

بتهمة جنحة اصدار شيك بدون،كيدوز الملف ديالو فجلسات،وكيصدر الحكم بالادانة ديالو بجنحة اصدار شيك بدون رصيد ...

وبما أنه خلص اللي عليه...

فكيكون الحكم موقوف التنفيذ (كيتحكم عليه بشهرين فالغالب) + غرامة مالية + البنكة ديالو كتمنعو من دفتر الشيكات لمدة لا تقل عن 10 سنوات.


■كخلاصة:يلا عندك شيك بدون رصيد...

يستحسن تحاول تحل المشكل بطريقة ودية (المحامي يقدر يساعدك فهاد الحالة و نسبة النجاح 99%).

ويلا الطرف الاخر امتنع،فيكفي تخلي المحامي ديالك يدير ليك شكاية عند وكيل الملك.

تعليقات
ليست هناك تعليقات
إرسال تعليق



    وضع القراءة :
    حجم الخط
    +
    16
    -
    تباعد السطور
    +
    2
    -